PRIMO INCONTRO ASOCIASIÓN VENETE

Ieri, 16 de Marso 2003, a vila Guidini a Xero Branco (TV) se ga tegnù, col patrosinio de l'aministrasión comunale, el primo incontro fra le asociasión venete ke se ocupa de cultura, storia e lengoa veneta.

Gà partesipà, in particolare, i raprexentanti de:

- Asociasión Veneto Nostro da Venesia
- Asociasión Europa Veneta da Venesia
- Asociasión Mataciancia da Padova
- Asociasión Teuta da Verona
- Asociasión E Nostre Raise da Trevixo
- Grupo muxicale Tamorti da Padova
- Asociasión Padania Ambiente da Padova
- Asociasión Milizia Veneta da Venesia
- Asociasión "Amici del Museo di Selva di Cadore" da Belun
- Asociasión poeti UCAI da Padova
- "Unione Ladina" da Belun
- Asociasión Venetikon da Vicensa
- Asociasión "Promozione Sociale Famiglia Veneta" da Padova
- Asociasión Sito Veneto da Vicensa

la jornada se ga svilupà in do parti: 'na prima prexentasión de ogni Asociasión o grupo culturale ke xera prexente e, dopo, 'na discusión e on confronto sora la cultura veneta e sora la posibilità de crear on coordinamento a livelo Veneto fra tute le asociasión e grupi culturali.
Ga vero i laori el sindaco de Xero Branco, el dotór G. Cappelletto, ke el ga manifestà disponibilità e intarese par la inisiativa, spronando i partesipanti a continuar so la strada dela rivalutasión de la identità veneta.
Dopo, el profesór R. Scattolin el ga ricordà la disponibilità de l'Asesór ala cultura e identità Veneta profesór Serrajotto a sostegnere le inisiative ke le operi a fianco dele aministrasión publike, in tel camìn longo finalixà a far riapropriàr i veneti dela so cultura e identità.
Dopo na breve prexentasión, dove ogni portavoxe el ga vudo la posibilità de prexentar la so asociasión e i prinsipali obietivi seguìi, se se ga confrontà fra tuti sora la posibilità de crear na sinergia fra le varie asociasión ke le opera in Veneto in te l'anbito culturale. In particolare, xe vegnù fora la exijensa de crear on coordinamento fra tute le asociasión ke xera prexenti, verto anca a tute quele ke le vorà farghine parte pì vanti.
Sto coordinamento el gavarà da servire prima de tuto come rete de comunicasión fra tute le realtà ke partesipa e ke le se trova in jiro pal Veneto e, de seguito, el podarà esare on strumento par elaborare inisiative e documenti comuni.
Fin da subito se se ativarà par creàr on database (arkivio informadego) dove ke vegnerà memorixà i dati e i riferimenti dele varie asociasión ke fa parte del coordinamento, mostrando so on sito web dedicà i eventi e le atività de volta in volta organixà da ogni asociasión sol teritorio.
Da sto incontro xe vegnù fora anca la necesità de dialogare e colaborare de pì in sinerjia co le istitusión publike ke se ocupa de cultura e identità veneta e de metare in pie na serie de inisiative culturali in forte colaborasión coi mass media del Veneto.