Cari amighi,

domenega 16 de Marso pasà se gavemo catà tra raquante asociasión culturali da ogni cantón del Veneto. Grasie al patrosinio de l’aministrasión comunale de Xero Branco (TV), gavemo vudo la ocaxión de catarse insieme, conosarse e confrontarse tra ki ke se intaresa de cultura veneta, de tradisión, de lengoa, de storia, de muxica, de poexia e de altri canpi culturali.

Oltre a noantri de Veneto Nostro ghe xera:
- Asociasión Europa Veneta da Venesia
- Asociasión Mataciancia da Padova
- Asociasión Teuta da Verona
- Asociasión E Nostre Raise da Trevixo
- Asociasión Tamorti da Venesia
- Asociasión Veneto.org dala Merica
- Asociasión Padania Ambiente da Padova
- Asociasión Milizia Veneta da Venesia
- Asociasión Amici del Museo di Selva di Cadore da Belùn
- Asociasión poeti UCAI da Padova
- Asociasión Venetikon da Vicensa
- Unione Ladina del Cadore de Medo da Belùn
- Asociasión Milizia Territoriale dei Sette Comuni da Vicensa
- Asociasión Promozione Sociale Famiglia Veneta da Padova
- Asociasión Club Veneti dala Jermania
- Asociasión Sito Veneto da Vicensa

L'incontro, ke el xe scomisà ale 15.00 a Vila Guidini, el xe sta organixà in do momenti. Ghe xe sta la prima prexentasión de ogni asociasión e, dopo, na ciacolada sora la cultura veneta e sora la posibilità de catar fora on coordinamento tra tute le asociasión e i grupi de cultura.
Ga scomisià i laori el sinico de Xero Branco, el dotor G. Cappelletto, ke el ga dito ke la so aministrasión comunale la xe interesà a darne na man par portar vanti sta inisiativa e ke el ga invità tuti quei ke se intaresa de cultura veneta a ‘ndare vanti cusida, tegnendo alta la identità veneta fra la xente.
‘Ndando vanti, el profesór R. Scattolin el ne ga ricordà la disponibilità de l’asesór ala cultura e ala identità veneta profesór Serrajotto a darghe na man a tute le inisiative fate par far riciapare ai veneti la so identità, anca in colaborasión co i enti publisi.
Se ga pasà quindi la parola ai raprexentanti de le varie asociasión venete, par parlar sora le inisiative e i obietivi e ke ognun porta vanti co el so laoro, scomisando cusì a vardare quali ke xe i ponti ke ne liga insieme e ke ne permete de colaborar in te la maniera mejo posibile.
Finìo el jiro de le prexentasión, se ga ciacolà sora la posibilità de catare on sistema par unire le forse, mantegnendo però oguno la pì conpleta autonomia.
Xe vegnù fora ke ghe xe sì bixogno de on coordinamento, ma anca ke xe mejo fare le robe in te la maniera manco ‘burocratica’ posibile, dando vita pal momento a on organo de riunión informale.
Se ga concordà sol fato ke ocore metarse davanti obietivi picinini, sensa voler fare robe masa inpegnative, anca par vedare pian pianin come ke se pole e se ga da laorare insieme.
El coordinamento quindi el ga esare inisialmente na rete de comunicasión tra le varie realtà ke ghe ne fa parte, par scanbiarse informasión, esperiense, solusión e aiuti, e solo in te on secondo tenpo el podarà servire par far inisiative e documenti comuni.

I raprexentanti de le varie asociasión ga fato le proposte ke vien vanti:

1) tuti i se ga catà d’acordo de fare on coordinamento tra le varie asociasión ke ghe xera ala riunión, verto anca a tuti i grupi ke vorà entrarghe a far parte pì vanti. Se ga concordà ke xe mejo on coordinamento informale, co manco burocrasia posibile, col nome de “Coordinamento Asociasión Venete”
2) butare xò na sorta de ‘manifesto’ del coordinamento de le asociasión venete co i ponti esensiali ke i partecisanti i garà da sotoscrivare
3) organixare on uficio stanpa par publicixare le atività de le varie asociasión, ke no vaga a sostituire comunque i soliti canali dei singoli grupi culturali, ma ke el serva invese da “in pì” par far in modo ke le notisie le riva anca ai mass media. Sto uficio stanpa el sarà anca on ponto de riferimento par domandare informasión. Vien domandà a l’asociasión Veneto Nostro de farse carico de sto laoro
4) fare on calendario de le atività e dei incontri ke ogni grupo culturale organixa o prevede de organixare
5) dare la posibilità ale varie asociasión de ogni anbito culturale (es. poexia, storia, lengoa, …) de poderse catare tra de lore par portare vanti in piena autonomia atività culturali fate insieme
6) come obietivo a longo termine, catare na jornada al’ano dove ke le asociasión del coordinamento, ma in jenerale tuti quei ke se intaresa de cultura in Veneto, posa catarse tra de lori par fare on dì dedicà ale varie atività. L’Asociasión Venetikon propone intanto par scomisiare de catarse ala festa del 25 Aprile prosimo, dì de San Marco patrono dei veneti, ala festa da lori organixada a Vicensa
7) ativare on novo sito internet dove prexentare le asociasión del coordinamento, i modi par contatarle, i so obietivi, e le atività portade vanti
8) fare dei database (banke dati) da dare a tuti i partesipanti; in particolare se propone de fare dei database par:
a. asociasión venete
b. scritori e poeti in lengoa veneta
c. grupi muxicali e teatrali in lengoa veneta o de caraterixasión veneta
d. libri veneti (in colaborasión co le biblioteke)
- par sto ponto se propone de ciapare contati co raquante biblioteke par farse dare eventuali elenki de libri a disposixión
9) creare on sistema de newsgroup/mailing-list (grupo de discusión via posta eletronica) par far ciacolare le asociasión tra de lore
10) verxare on forum via internet par scanbiarse idee e opinión
11) curare l’aspeto internet sensa desmentegare però la inportansa fondamentale del ‘vardarse in te le bale dei oci’ tra ki ke partesipa al coordinamento ma anca co ki el xe interesà a farghine parte
12) publicixare el calendario de le atività de volta in volta so publicasión periodike venete (es. La Sganassada, Raixe Venete, Quatro Ciacoe, ecc…)
13) sercare de catare spasi in te i mass media par far conosare la cultura veneta. Se propone de ciapare contati co le radio e le tivixión ke pole esare pì sensibili par sta atività
14) domandare, come coordinamento de le asociasión venete, l’insegnamento dela cultura e de la lengoa veneta in te le scole e organixare, in colaborasión tra i gruppi culturali interesai, dei corsi di lengoa, storia e cultura veneta
15) tegnere senpre informai i asesori ala cultura de la rejon e de le provinse, ke podarà cusida savere come ke se movemo e podarà vengere a savere de le varie atività de le asociasión del coordinamento
16) sercare de colaborare de pì co le istitusión publike par fare cultura veneta, sercando de sensibilixare ste ultime a fare la so parte
17) parkè on vero coordinamento el posa funsionare sol serio, xe inportante ke ghe sia rispeto e fiducia tra ki ke partesipa. Xe quindi inportante ke ghe sia pì contati posibili tra i diversi grupi, par vedare se ghe xe de le posibilità de fare robe insieme e comunque par conosarse mejo. Se propone a sto propoxito de partesipare, quando posibile, a ste inisative: Venetikon, el dì 25 aprile 2003 a Vicensa , e Patavium Celtic Festival, dal 29/5/03 al 29/05/03 al Parco Roncajette (Camin) –Padova
18) se propone ala fine de catarse el 18 de Majo ke vién, senpre a Vila Guidini de Xero Branco (TV), par na riunión operativa.

Par ki ke jera prexente ala riunión de Xero Branco del 16 de Marso

Insieme a sta letara ke ve xe sta mandà, catarè anca sti documenti:

- on database so carta de le asociasión ke ga aderìo al coordinamento dele asociasión e grupi culturali veneti; a tuti i grupi ke vegnerà ala riunión del 18 de Majo vegnerà dà anca la versión so formato informatego;
- on database so carta de tute le asociasión ke se ocupa de cultura veneta, divixe par provinsa; a tuti i grupi ke vegnerà ala riunión del 18 de Majo vegnerà dà anca la copia so formato informatego;
- on database so carta dei recapiti dei prinsipali mexi de informasión;
- la rasegna stanpa sora la riunión del 16 marso.

Ala riunión del 18 de Majo, ke ve vegnerà confermà co naltra letara, le varie asociasión le xe invitae a portare el so pensiero so le proposte sora elencae e, eventualmente, fare nove proposte da discutare insieme.