OGGETTO: lavori par la revixón del Statuto de la Rejon Veneto

A tuti i Consilieri Rejonali de la Rejón Veneto
Dàndoghene notisia a:
Prexidente Rejón Veneto
Giancarlo Galan
Prexidente Consilio Rejonale
Enrico Cavaliere
Asesor al’istrusión e ala cultura
e identità veneta de la Rejón Veneto
Ermanno Serrajotto


Jentile siór consilier,

Xa da na s-cianta de tenpo a se ga verto la discusión sóra el novo Statuto da darghe a la Rejon Veneto. Come asociasión che se ocupa de la valorixasión e difuxión de la cultura e de le tradisión del nostro popolo, Ve femo prexente el nostro sostegno par l’inportante lavoro che si drio far, e se augurémo che tute le decixión che ciaparè le sarà fruto de na discusión e riflesión serena e equilibrà. Tegnendo conto anca de l’esperiensa vuda co le nostre atività se augurémo che la scritura de sto documento la sìpia na ocaxión par ribadir la funsion inportante de la cultura locale rento la società veneta, idea pienamente espresa da le parole «Popolo Veneto» che ghe xe xa sol Statuto de deso de la nostra Rejon e par riafermar la necesità de on pluralismo culturale, espresión de na vera democrasia.

’Sto fato qua, a xe ben ricordarlo, no ’l risponde a lògiche de partito ma senplisemente ai andamenti socio-culturali de deso che ghe xe in tuta Europa, oltre che a le evidense de la storia, che i pari fondadori del Statuto i ga sajamente savudo antisipar int’el so lavoro. Come che Elo el savarà xa, le parole “Popolo Veneto” le ghe xe rento al Statuto del Veneto da trent’ani, e le xe stàe ratificade dal Parlamento Talian che quindi el ghe ne ga riconosudo la piena lejitimità.

Se riconosémo in pien inte l’articolo 2 del Statuto de deso che ‘l dixe: “L'autogoverno del popolo veneto si attua in forme rispondenti alle caratteristiche e tradizioni della sua storia. la Regione concorre alla valorizzazione del patrimonio culturale e linguistico delle singole comunità.”

A ’sto propòxito femo notar che la dicitura de “popolo” la ga na valensa jurìdica riconosuda e tutelada anca in sede internasionale. Donca par noaltri sta formula la xe un strumento in pì par tutelàr, valorixàr e trasmétar vanti sol tenpo la nostra identità de Vèneti che la vien fora anca traverso la nostra cultura, storia, lengoa e tradisión.

Donca el sarà anca Elo d’acordo, che xe mejo tegnere sta fòrmula xa acetada da tenpo.

Esprimémo quindi la speransa che co l’aprovasión del novo Statuto, non se casca in conportaminti che i ga l’obietivo de negar o comunque de indebolìr le culture e identità locali ma se augurémo invese che anca Elo el porte vanti i prinsipi de libartà e democrasia fondamentali inte la nova Europa che tuti insieme sémo drio costruir, baxada so prinsipi de toleransa e de asetasión de le diversità culturali.

Xe sta scrito dal sociòlogo Sabino Aquaviva: ”…il più importante è il problema della tutela della lingua dov’è ancora viva. Se non viene tutelata la lingua, l’identità muore. Ricordo che quando i genitori parlano con i figli una lingua che non è la loro, quando impediscono ai figli di parlare la loro lingua, quando gli dicono che non è corretto esprimersi in quello che ritengono un dialetto, e soprattutto quando i figli si vergognano di parlarlo fuori casa, a quel punto la sopravvivenza dell’identità di quel popolo è alla fine. Quindi, il veneto è una lingua che va tutelata e insegnata a scuola,e non un’ora la settimana, ma, massicciamente, quasi come l’italiano.”

Par finire, el Coordinamento Asociasión Venete riconóse sol novo Statuto un strumento fondamentale par realixàr la società vèneta de deso e quela futura. Anca dal Vostro lavoro dipendarà el Veneto che vegnerà vanti, e sta a Voaltri scrivare na leje che la sia motivo de orgolio par le jenerasión che vegnarà, come che xe par quele de uncò el Statuto de deso de la Rejón Veneto. Ciapando le parole de Giuseppe Viscovich inte’l Juramento de Perasto del 1797: “Savarà da nu i vostri fioli…”.


Co Rispeto e augurandoVe bon lavoro,

Padova, 12 de Disenbre 2003

Par el Coordinamento Asociasión Venete