STANPA

Xe on mucio le imajini in vario modo incuietanti ke ga segnà sti ultimi mexi de violense, guera, distrusiòn. Dei straordinari fotogrami i ne ga mostrà tuta la dramatisità dela morte de tanti inosenti (a New York come in Axia); altre invese ne ga comunicà la disperasión, la paura o el smisiamento de ki soporta la storia ke altri omani fa e desfa. Ma mejo de tante fotografie xe forse on dixegno a descrivare ben el nostro tenpo e se trata de na ilustrasión ke rafigura na statua dela libertà inbavajà, cusì come ke la conpare sora la copertina del'ultimo libro de Gore Vidal: on testo rifiutà dai editori mericani e ke xe stà publicà in italia da Fazi. El gran monumento newyorkexe ke se kata darente la baja del fiume Hudson pole parere anca teribilmente kitsch. El xe de dimensión spropositae, sensa elegansa, tuto fora ke on figurìn (el volto el ga lineamenti duri e sensa speransa). Ma comunque sta statua la xe on simbolo straordinario parkè la civiltà mericana xe stà, e xe, kalcosa de presioxo par la umanità intiera.
Inbavajare ke la facia tanto conosuda e tanto evocativa vol dire evidensiare ke, anca se soi ultimi do secoli i Stati Unii i ga vudo on ruolo tanto inportante a difexa dei ideali de libertà, uncuò le robe forse xe drio canbiare. Quando ke el terorismo ga colpio New York, se ga subito visto ke i teroristi gheva xa vinto. Volevei svodare de ogni senso la civiltà liberale e la sentralità ke sta qua da al'individuo? I ga vudo piena sodisfasión. Bin Laden e Al Quaeda i jera perfetamente consapevoli ke l'ataco gavaria portà a na reasiòn orba e violenta da parte de Washington: e sta reasiòn ghe xe stà. Exatamente come ke jera stà domandà e prevista. Bin Laden e i so omani no i xe interesai a dominare la Merica e l'Europa. El so projeto fondamentalista el riguarda el mondo musulman e, in primo logo, l'Arabia Saudita. Ma xe vero ke el projeto de unificasión del mondo musulman intorno a on disegno politico "radicale" ga bisogno, da staltra parte dela baricata, de on Osidente disposto a esare el catalixatore de ogni frustasión e cuindi determinà a xogare on ruolo inperiale: paladin de Israele senpre e comunque, determinà a inpore el Stato moderno e la democrasia al mucio de tribù del'Afghanistan, decixo a fare da sostegno a emiri intoleranti e rais sensa scrupoli, aserajà rento le so baxi militari in Oriente e in ogni parte del mondo. Tuto xe 'ndà secondo i piani del terorismo islamico. Soi Stati Unii (ma anca in Gran Bretagna, Francia e parfin in italia) ghemo visto vegnere fòra ogni jenere de burqa: a nisun osidentale xe stà domandà de metarse el vestito tradisonale afghano ke i talebani ga inposto ale so femane, ma tuti gavemo visto vegnere fòra on skermo tra noantri e la realtà. Na fita cortina de fero xe calà par inpedirne de parlare e pensare, mentre la vergognoxa retorica del patriotismo taliàn e/o mericàn militarixava la società intiera e faxeva pasare ki ke no jera d'acordo come on militante no global. Ogni posibile dibatito sora le bombe butàe soi sivili xe stà sofegà soa cula e, anca se se ne ga inacorto in poki, la benda rosa mesa so la boca dela statua dela libertà ga finio par costrinxerne tuti al silensio e ala conplisità. Intendemose: no ghe xe in italia, come sol resto del'Osidente, nisuna forma de censura direta.
No ghe xe on governo ke el posa, par esenpio, sarare de colpo on jornale come "Raixe Venete" e fare in modo ke no el vegna pì fora. Ma xe anca vero ke ki uncuò el vole difendare la tradisòn mericana autentica (cuela dei Fouding Fathers, de Henry David Thoreau, de Lysander Spooner e pì visina a noantri de Murray N.Rothbard) no katerà mai spasio par le so idee soi mexi de informasiòn pì grandi: ke tra le altre robe i xe tuti finansiai dal Stato, diretamente o indiretamente. (Va ricordà ke parfin el mucio noto libera Gore Vidal el xe stà sì publicà da "La Repubblica", ma solo co dei taji on mucio grandi). Xe, comunque, soratuto on ritardo culturale cuelo ke inpedise analixi pì serene e rasionali, e ke fa sì ke ogni analixi controcorente la sia tajada fòra. A destra come a sinistra, in efeti, se fa fadiga a intendare ke se Bin Laden xe sicuramente on criminale, el so suceso tra le mase islamike xe devegnù pì fasile par la politica estera osidentale sconsiderà e interventista, ke ga cauxà solo soferense ala Europa e ala Merica, sensa jutare minimamente i paexi del Terso Mondo. Ghe xe considerasiòn elementari, parfin banali, ke no pole esare evitae (a dispeto de ogni censura e autocensura). La prima de ste considerasiòn xe ke ghe xe dele strete relasiòn tra la politica estera "inperiale" dei paexi osidentali (e soratuto dei Stati Unii) e l'odio antimerican ke xe fasile percepire in larga parte del Terso Mondo e soratuto soi paexi musulmani.
I Stati Unii i xe stai autenticamente liberali cuando i xe restai fedeli ale so orijini e, cuindi, ala politica estera ixolasionista ke par Thomas Jefferson e George Washington garia dovuo caraterixare in ogni momento la storia dela nasión. Davanti al falimento de na strategia par inpore el "Novo ordine mondiale" ke stava a core a George W. Bush pare, xe rivà deso el momento de pensare la politica estera solo come aparato difensivo, el cui conpito ga da esare solamente cuelare i sitadini contribuneti. E ninte de pì.
La politica inpiciona e non de rado corota ke in tuti sti ani xe sta portà vanti dai paexi osidentali - no solo dai Stati Unii, ma anca dala Francia, dala Gran Bretagna e parfìn, soi ani pasai, dala italia (pensemo ala Somalia de Siad Barre) - ga prodoto i fruti velenoxi ke deso tuti noantri semo costreti a parare xò. I "aiuti umanitari" xe stai vendui par conprare armi; el "suporto ala paxe" se ga fasilmente convertio in sostegno a cuesto o a cuel grupo criminale; la "modernixasiòn" pianificada dal'alto par inisiativa de picole èlites tecnocratike ga creà fenomeni de rijeto e ogni tipo de coluxiòn economica e finansiaria tra politisi (osidentali e no) e inprenditori amighi; i enbarghi e i dasi co i cuali se ga agredìo el dirito a comerciare libaramente i ga alsà stecai economisi ke se ga presto convertìo a bariere ideologike. El militarismo e/o l'umanitarismo (speso travestii da "realismo" politico") de cuanti ke ga volesto intervegnere in Corea, in Vietnam, sol Golfo, soi Balcani e in Afghanistan - par limitarse a citare i epixodi prinsipali - ga portà solo ke odio e dispreso intorno ala Merica e al'Osidente. E uncuò noantri semo vitime do volte: minaciai dale organixasiòn teroristike dopo esare sta costreti a finansiare aventure inperiali ke jera so l'escluxivo intarese dele clasi politike osidentali. I politici i ga moltiplicà sol mondo i nostri neghi. No i ga savudo difenderne. E deso, come se questo no bastase, i pretende de ridure sempre de pì la nostra libertà. Se la guera xe come infati la xe l'igiene delo Stato (ke trae forsa e posibilità de espansion da ogni conflito), co l'ataco teroristico ghemo poduo constatare cuanto ke xe forte el potere de ki governa; e cuindi anca cuanto debole ke xe la nostra autonomia. L'ataco a New York ga fornio a ki ke dispone dela nostra vita e dei nostri skei (a Washington, a Londra, a Roma, e vanti cusì) el pretesto par rinforsare i poteri publici ancora de pì. In italia, par exenpio, se ga acetà come se no fose niente n'altro aumento del'inpoxisiòn dele tase, ma on fià dapartuto se asiste a on restrinximento dele libertà personali e dela libertà de circolasiòn dei capitali. Col pretesto del terorismo, internet la xe drio vegnere mesa soto controlo, mentre ogni privacy xe ormai destinà a esare violà. La lota ale finanse del terorismo, in pì, ga consentìo de ripropore la solita litania contro i paradixi fiscali e contro la speculasión finansiaria in Francia, anca par sto motivo, xe sta varada la Tobin Tax). Par 'ndare in Merica on sitadin talian deso ga da domandare el visto al consolà pì visin e anca i americani ghe tokerà farse la carta d’identità. Roba dala cuale fin deso i jera riusii a scanpare. El Stato moderno, so la so astuzia on mucio granda, el mostra de saver ciapare nova vita e enerjia dai so falimenti: bon da niente quando ke se trata de difenderne e ansi cauxa prima dela nostra insicuresa, el rivendica on controlo senpre pì grando sora le nostre vite e justifica sta roba dixendone ke solo so sta maniera la nostra vita poderà esare manco esposta a ris-ci e minace. De fronte a ste robe xe necesario ridire ke el statalismo no pole esare la solusiòn ai nostri mali, dato ke xe propio elo la cauxa prinsipale de tuto sto drama. La nostra società ga rajunto liveli de svilupo straordinari, ma solo cuando ke lo Stato el mancava del tuto o el jera prexente in maniera marjinale. Soi setori monopolixai dai aparai publici xe fasile catare makine da scrivare eletrike ke pare vegnù fora da telefilm mediocri dei ani Setanta, e soratuto, lojike burocratike contorte e ineficenti ke testimonia come ninte de cuelo ke xe jestio da politici e burocrati xe al'altesa coi tenpi. So sto senso, l'ataco ale Twin Towers e el sucesivo stato confusionale dei aparai protetivi del Stato (dala Cia ala Fbi) ga rexo evidente come ke sia oramai vegnù l'ora de canbiare diresiòn anca in tema de sicuresa. Soi ultimi ani i sitadini americani i ga destinà on mucio de skei par mantegnere on exercito de omani ke milita in organismi federali de vario tipo, ma el risultato xe soto i oci de tuti. No solo ste organixasiòn de Stato no ga previsto ne inpedìo l'asiòn dei kamikaze omicidi, ma se ga dimostrae del tuto spiasae davanti ala minacia del terorismo islamico. Xe fasile imajinarse come in America saria pì eficace, par exenpio, na protesión afidà no a na sola ajensia de “intelligence”, ma a sinquanta (una par stato). E xe anca ciaro e lanpro ke ulteriori contributi poxitivi podaria vegnere da nove inprexe privae ke le entra so sto setore co l'obietivo de sercare clienti: proponendo i propri servisi a inprexe, conpagnie de asicurasiòn, comunità locali, e cusida via. L'intero universo dela protesión, insoma, vegnerìa al pì presto cava via dale man del Stato, in modo ke vegna fora on vero marcà dela protesiòn e ke cuindi sai posibile contrastare co eficacia le minace pì insidioxe ke xe orientà verso de noantri. Eco parkè bixogna reajire al "statalismo de ritorno" ke ga segnà sto ultimo ano. Bixogna rijetare l'idea ke "pì sicuresa" gabia bixogno de "manco libertà". L'esperiensa ne insegna exatamente el contrario e ne dixe ke solo traverso na ridusión del potere statale sarà posibile ridure le raxón del'odio ke circonda l'Osidente e creare on sistema protetivo pì dinamico, concorensiale, eficace. La nostra società xe rica de injegni, persone intraprendenti, omani corajoxi e audaci. De fronte ala difuxa domanda de sicuresa e protesión, on mucio de lori saria contenti de poder dare vita a inprexe privae ke se incarika de difenderne da ogni posibile minacia e ke le viva dela fiducia dei so clienti. No xe cuindi agredendo i diriti individuali e riduxendo senpre de pì i spasi dela libertà de iniziativa ke sarà posibile rispondare eficacemente ala minacia teroristica. Ma xe elora necesario sbregare sto bavajo: e cuindi salvaguardare le libertà fondamentali, svincolare la finansa da ogni voncolo, sbasare la tasasión, dare voxe a ki ke no xe d’acordo, riportare la politica estera a conpiti de mera difexa, introdure spasi de concorensa e conpetisión so ogni setore (a partire dala protesión). El statalismo ne ga portà so sto vicolo cieco ke uncuò ne costrinxe a fare i conti col fanatismo islamico.
No sarà el potere publico, elora, a liberarne dai problemi ke uncuò ne sìdia.

Carlo Lottieri