STANPA

I
Candida maga, come mai nissuna
Sirena al mondo à rimirà le stele:
vita de gran marcanti e de putele,
forsa de vele, che spense in mar…

Nìo de morosi, in pasto de la luna,
nìo de colombi, che te beca tuta,
quei, che te gode e in brasso tuo se buta,
no te podarà mai desmentegar…!

II
Come contarle mi le to caresse,
o indormensada sora eterni legni;
dona de marmo, sgrafà zò dai segni
rossi, de ongiade, del to bel Leon?

Ci desmentegarà le to grandesse,
la to Piassa, el ti Ponte, el to Palasso,
le to gondole, che in fila in «Canalasso»
quasi scapade via da la preson?

Quele gondole negre su i canai,
le par fate de dame e de sospiri
e le se perde in meso ai so rigiri
drento a un Rio, soto un troso, in do' le volBR>
da par tute le parte, sensa mai
quasi tocarse, sensa mai parlarse,
come figure in via de palesarse
elì uno pronto: «Fermi, no se pol!»

Ecole vive e subito scomparse, nel gran silensio de i palassi al sol!

III
Oh, che tremendi, quando se li lese,
i «papiri» del rustego dialeto
intrapolado de latin… I «Diese»
del gran consilio veneto segreto,

che te segnava col supremo impero
la strada dritta de la dea Rason
anca se no era sempre veritiero
quel che dasea la «Boca del Leon»!

IV
Cale e boteghe!- 'Na parsona sola,
par barufe, par ciassi , par finesse…
I dissegni li fa la frutarola
E i quadri a… oio, quei che frise el pesse…

Fonteghi, busi, bàcari… Equa sede
ricamade co l'oro de sechin,
là antichità e foresti che ghe crede,
tra na ventada alegra de morbin…!

L'è quel morbin, che fa sorbir le scale
A salti, a trati, de anime in calor,
che i >Venessiani par che i g'abia le ale
e a mi, vecioto, me scombate el cor;

che ne le cale tien gente a righe,
sensa mai dubio la se possa urtar,
come in campagna gira le formighe
su e zò par la scorsa de un morar!

V
O Venessia de artisti e de Madone,
mi, te vòi tanto, e tanto ben,
che te si fatat come çerte done,
che tien drento el più amabile velen…,

Te si de bronso come i to Cavai,
ma sul tramonto te devnti d'oro…
Sì, che i to ponti j è dei canociai,
che ne spalanca el fondo de un tesoro,

come quei canociai fati de carta,
che da putei se combinava su,
pur da poder fermar prima che i parta
i sogni sbusi de la gioventù!

E mi vedo scapar Bianca Capelo,
e i cavei spampanadi sul balcon
e'l muso negro del geloso Otelo
e Marco Polo a spasso col «Milion».

Gh'è el galante Goldoni, che me bate
Col bastonsin dal pomolo, 'na spala,
e Marin Falier da le idee mate,
che l'à perso la testa par la scala…

-E ti, che te si qua bel zoveneto,
che te me tiri par el gabanin?
-Ah, mi son mi, quel «poro Fornareto»
che i mantien sempre l'oio al so lumin!

Passa davanti femene in bauta…
'Na scurlada de rosso: Pantalon!
E Arlechin consolà de pasta suta,
Colombina e Rosaura in tentassion!

Fin che tra cale e scùrtoli intrigai,
marionete e lustrissimi sui ponti,
co sto sognar, che no finiva mai
me dimandava: Insoma in dove sonti?

-Semo a Venessia, «pare»,- eco, risponde
un barcarol, che me vogava verso;
e do gondole strambe e vagabonde:
«Tolì in brasso quel toso, che el s'à perso».

'Na ridada che scapa…! Quel sengioto,
che fa l'oinda sbatendo ne la riva…
Me sentiva mancar la tera soto
E qualcossa de drento che moriva

A poco a poco!- Fis-cia el vaporeto;
ciama na vosse:« Per la ferrovia».
Uno me tenta de passar tragheto,
me trovo imerso inte na fantasia;

sì, che de colpo, un sguisso, un lampo, un salto,
un sbatar d'ale, un brontolar de ton,
me porta in aria a guardar zò da l'alto,
sequestrà fra le sate de un leon!

VI
«Pax tibi marce evangelista» spiega
una vosse lesendome el pensier…
Eco l'insegna de la me botega
E sta sera sarò el gondolier…!

Te porto a spasso sora la laguna,
prima che in l'aqua se indormensa el dì…
Ah, no capita a tuti la fortuna
De viagiar co una bestia come mi!

Eco Muran, la «Roca» del galeto,
che supia veri de galanteria
e Buran la «Regina» del merleto,
che se trama la dote in poesia…

Là gh'è Torçelo, primo asilo verto
Ai sbandai de Grado e de Aquileia
E san Francesco dito el «Deserto»
Dove no alberga nissuna fameia!

Anca i Armeni, nel so eremitagio
( tanto de barba, sempre libri in man)
i te stampa in qualunque sia linguagio,
forsi anca el nostro vecio venessian…

Quei colossi là in fondo j è i «Murassi»
fioi de la gran muralia de la Cina…
ah j è stà bravi de ciaparle a… sassi
le furie de la veneta Marina…!

J è quei là che tien su tuta Venessia
Mantegnendola giusta de aqua e sal…
Ma gh'è i «Mori» che sona e mi gò pressia,
anca par sto pensier del piedestal…

Semo su la «Piasseta» e qua te sbarco:
va drento in ciesa a far na divossion;
mètete in bona grassia con San Marco,
che mi no uso… i m'à cambià paron!

L'è tornado al so posto a far el morto
Su la colona, co la coa rissà…
(I Venessiani no i se n'à inacorto,
«Todaro» forsi, quel, brontolarà!)

VII
Desmontà da la magica vetura
Co le gambe e co l'anima sospese
Par la tema de far bruta figura,
son cascà ne la «Ciesa de le ciese»…!

Intabarada de mosaico d'oro,
che ghe cuerse le spale in giro e in tondo,
eco, nel so magnifico tesoro
la più bela Basilica del mondo!

Da sta imensa sfadiga de tocheti
Impastadi de arte e de slusori
Salta fora i Miracoli, i Profeti
Angeli e Santi, trombe e ambasciatori;

se spalanca le ante de i Misteri,
fati de astussia, forsa e volontà,
che manda in visibilio i forestieri
e porta ai sete çieli la çità!

VIII
Ma na musica sconta de strumenti s'à messo a fiorir su da no so in d'onde,
chè San Marco g'à çerti tradimenti,
che par de caminar su par le onde:

una musica vecia, moscardina,
che sveia i morti e trapassa i muri:
j è le «Crussiate» de la Palestina,
co i pifari, co i timpani e i tamburi;

si che le teste perse par le strade
de quel portento de tapessaria,
confidandose un grùmolo de ociade
de santa, in venessian, diplomassia,

se dimandave quele facie nere,
smaraveiando da la novità:
«Tòrnele dunque ancora le galère
de Missier Rico Dandolo in çità?»

IX
-Gloria a Venessia!- tra na gran sagrada
de fantastiche musiche e de cori,
«Quel» che sul «Libro d'oro» de casada
scriveva el nome dei pì gran Signori;

«Quel» che sensa far tanti «brigi e brogi»
co l'aiuto del popolo e de Dio,
el ghe pusava el Corno in testa ai dogi
e se i falava, el ghe dentava drìo;

«Quel» che mandava fora le «galìone»
le catapulte ei «homeni de arco»
parchè i tornasse carghi de colone,
da tegner su la casa de San Marco;

co una gran vosse, che à fermà i incanti
de sto bel sogno tuto quanto mio,
come nei veci oracoli parlanti,
me son sentido strologarme drìo:

«Credi ne l'arte, che tien vivi i Santi,
spera ne la republica de Dio!»


Berto Barbarani