STANPA

articolo publicà so Raixe Venete numaro 10

El 14 de setenbre 2003 restarà na data storica par la Svesia: el 56,8% dela popolasión, difati, ga dito NO ala adosión dela moneda unica europea.
Mejo tegnerse la corona svedexe: sta chi xe sta la volontà dei sitadini che, in piena libartà, i ga posudo far sentire la propia voxe desidendo quelo che i ritegneva che fose mejo pal so futuro.
la Svesia resta alora fora dai Paexi che dopra l'euro, insieme a Gran Bretagna e Danimarca.
Na sconfita on mucio pexante, a scomisiare dala stesa Union Europea.
Romano Prodi a caldo el ga dichiarà che "da deso in 'vanti la Svesia dopo el "NO" ala moneda unica la perdarà de influensa in te la UE". Xera sta lu steso a dire, pochi dì prima del referendum popolare, che el voleva vedare la Svesia unirse ala moneda unica "novo protaginista de l'economia mondiale", ma che sta decixión la doveva esare ciapà oviamente dal popolo svedexe.
In jiro par la Europa ghe xe chi che resta contrario ala "moneda unica" e pol votare in maniera libara se acetarla o no.
Purtropo da nialtri le robe le xe on fià difarenti. Qua nisuni ga domandà ninte ala jente che, in maniera par ninte democratica se vardemo a l'estero, la se ga catà a fare i conti co i mile problemi che xe rivà dopo la adosión de l'euro.
In Italia la leje la vieta qualsiasi referendum parché l’articolo 75 c. II dela costitusión "vieta che le leggi di autorizzazione alla ratifica di trattati internazionali siano sottoponibili a referendum popolari abrogativi"...
Vién lojico conplimentarse alora co Paexi come la Svesia par aver da' la ultima parola ala so jente so on argomento cusida inportante. Anca in Danimarca l'euro xera sta rifiutà dala jente in te'l referendum del 2000; là i tornarà a votare co on novo referendum pì vanti, ma in Europa i ga paura de na nova sconfita (o magari xe mejo ciamarla Vitoria!).
Eurolandia la trema, e i svedexi i festeja: ga vinto la democrasia.