STANPA

articolo publicà so Raixe Venete numaro 10

anca el Veneto ga le so minoranse: na rikesa in pì de la nostra tera, da protèxare e da jutàr El primo insediamento de pastori e de boscaioli todeschi int'el Altipiàn de Axiago el risale ncora a metà del XI secolo.
Manca, purtropo, documenti che posa dirne de pì, e podemo ricostruire come che xe ndade le robe solo grasie ai indisi che gavemo.
Savemo che sol 1036 l'inperador Corrado II el ga dà el feudo de Onara e Romano, darente Basan, a Hezilo, fiolo de Arpone, capostipite de la fameja dei Da Romano; pare che sto qua el gabia portà arquanti conpaexani in te l'estremità de oriente de l'altopian. Comunque sia ndade le robe, le abasie Benedetine le ga vudo on ruolo inportante. I lengoisti che ga studià la lengoa cinbra i ga savudo dirne che i primi coloni i xera rivadi dal Tirolo de ponente, tera ligada ala abasia de Benedichtbeuern. Sta potente organixasiòn la tegneva contati co i benedetini de S.Maria de Organo a Verona e de Campexe, tacà Basan.
Sora l'altopian se forma cusida, na s-cianta ala volta, sete comunità todesche, ciamade i Sete Comuni, co capitale Axiago.
Da qua altri todeschi i se sposta a Posina e in Folgaria.
On fià ala volta, tra novi arivadi da Nord e coloni nati qua, i todeschi i ocupa parte del Trentin (lavarone, luserna, Vali del Leno, Valarsa) e del Veneto (vali del Paxubio, monti de Malo, Recoaro, Valdagno).
Ncora, ala fine del XIII secolo, altri todeschi i riva xò in Veneto, dando vita in Lesinia ala comunità dei XIII Comuni.
la migrasión de todeschi verso le nostre tere no se ferma e la vanti fin al 1400.
A partire dal 1300 i coloni no i vien pì ciamai todeschi, ma cinbri, dal todesco mediovale zimberer che vol dire "boscaiol", "carpentier".
Quando che la Republica Veneta de San Marco la ciapa el controlo de ste xone, che prima le xera soto el dominio dei Scaligeri de Verona, la prima roba che la fa la xe de metarse d'acordo co ste comunità, secondo el schema che de solito la Serenisima seguiva so sti caxi: libartà in canbio de fedeltà.
I Cinbri i se inpegna infati a far la guardia al confin de la Republica, Venesia in canbio concede de fato na picola "Republica Cinbra", conpletamente autonoma, squaxi exente da le tase, col dirito de aver par pàroci preti de lengoa todescha.
Naltro exenpio, se ghe ne fuse ncora bixogno, de quanto vanti che xera Venesia in confronto al resto de l'europa (indove i "diversi" par lengoa, relijon e rasa i vegneva sterminai ogni dì).
Col tenpo le comunità cinbre le vien comunque asimilae da quele venete, poco ala volta secondo i ritmi naturali de sti caxi.
Al di de oncuò i parlanti cinbro i xe pochi, concentrai a Roana, Luserna e Giaza.
Xe interesante vedar che par i sinquesento ani de dominio de la Serenisima se ga mantegnuo pì o manco la cultura e lengoa cinbra so sti teritori e che xe bastà pochi ani de dominasión tajana par desfar fora tuto. Par exenpio, durante la prima goera mondiale, i cinbri i vien perseguitai e incarcerai: la colpa sua de lori la xera de parlar na specie te todesco, la lengoa de i "nemighi de la patria”.

P.R.