STANPA

Eco la storia ke ne ga mandà Jacomo, on nostro amigo ke vive in Braxile e ke el ne conta de come i veneti emigrà e i so disendenti i vive in’tel so paexe, distante dal Veneto

I Veneti del Mondo, se tanto i se par intrà de luri, i se dà da foresti co ghe toca parlar e viver la vita de tuti i jorni. Parkè se non ghemo na patria e semo involta pal mondo, se toca viver nei paexi dei altri a la so moda.
Un poco manco i sente i Veneti dea Italia, ma sol un poco manco, parkè anca là noi gà l so paexe, i vive in Italia.
In un primo contato intrà de noantri, i poki Veneti del Mondo ke i se fida a ciacolar coi Veneti dea Italia, i proa doperar l Toscan, ke sbalio! La nostra lengoa de fameja la merita l so posto in tei contati frà de noantri, e cusì se fà amici. Eco ke la gò inparada sta roba, asè l Toscan Veneti del Mondo! E ogni tanto mi scrivo ai me amici, cognosui in lengoa de Tiziano e Vivaldi (sì sti due soci i xè Veneti!). Eco ke adeso mi ve conto come se vive come un Veneto fora dea Italia, pì drito e s-ceto, nea Colonia Veneta del Braxil. Quà se parla na lengoa ke i ciama "Portoghexe" ma un tanto diferente de kuela de PortoGalo ("Braxilian" mi diria), e ncora depì parkè semo darente l Argentina, e la influenxia dei vicini se marca anca noantri. Al punto ke i pì furbi kuà i inpara parlar l Castillano sensa gnanca pagar par studiarlo. Xele robe?!?
Tanti frà de voaltri ncora parlon l Veneto, ma a noantri kuà, distante 150 ani, con poki libri, manipolai dai preti, profesori, politeghi pagai dala Italia, e in medo gente foresta, parlemo l Portoghexe. Ciarisimi i tuxi come mi ke i parla ben la lengoa dei nostri noni. Non xè colpa dea me generaxion, pero, la corona saria longota de dirla e kuà no la ghen stà. E de storie cative non volemo pì gnanca noantri. Smenteghemo le robe rugne con un ocio nel futuro! La nostra cità pì inportante se ciama "Caxias do Sul", o "Casia", ma ghemo na mucia de altre intorno in un giro de un 200km torno la nostra "capital". Le pì vecie i se gà fato trucar l nome (par via dea Seconda Guera, ke i se gà proibio de parlar la nostra lengoa, incluxo l nome dee cità). Ma de cità pì dovene ghenè Nova Padoa, Nova Bassano, Nova Brescia, ... Ghenè anca altre cità, in altri stati, i Veneti gà fato fameje grande e semo ndai par skuaxi tuto l Braxil, portando progreso e civilità. Ma sto progreso se gà portà dei problemi. La perda dea nostra identità, la mescolansa coi Braxiliani (la me generaxion xè drio inbastardarse da indrisar i cavej).
De parlar in progreso noantri in Braxil se tegnemo mia de orgolio dee nostre fabrike, vere multinaxionae fate dae nostre man e da paroni del nostro popolo (alcune beike in man de foresti, far kè?), dee olte anca i paroni xè nostri parenti. Fabrike ke polemo dir: Marcopolo (autobus, la seconda pì granda fabrica del mondo dopo la Scania), Randon (inplementi par rodovie e makine fora-strada), Tramontina (robe de cuxina e jardin in Inox), Agrale (boni tratori, motoçicli e camignoni cèi), Eberle (metalurgia e motori eletreghi), Grendene (scarpe). Se ghemo fabrike grande, anca ghenemo na mucia de cee, e anca femo bon vin, e salame e polenta. Tanti dei nostri ncora i vive da contadini (o "coloni" come ciamemo kuà). E anca luri i se fà siori. Ormai, no ghenè pì Veneti poareti in Braxil. Semo parte dea elite del paexe e poki magari i gà dificoltà par viver, gnensun pì pasa fame, anca kuei in pedo. Kuà se guadagna poco, un operaio l guadagna i so 100-150 Euri al mexe. Con studio se guadagna 500 Euri.
Giacomo B.
fltrn@email.com