STANPA

A 31 ani de distansa ricordémo la straje de Derry subìa dal Popolo Irlandexe par opera del’exercito inglexe

Domenega, 30 Xenàro 1972

Ore 15.00
Fra le 15.000 e le 30.000 persone, òmini, done, on mucio de putèi, ke i rivava da tuta l'Irlanda, i se ritróva so la colina de Creggan, in te la xona de Derry liberà tri ani prima dala lota popolare contro le forse britanike. El governo de Belfast però el ga proibìo ogni tipo de corteo. I inglexe, no riusendo a sconfìxere l'IRA, la avanguardia armà dei irlandexi, sol canpo de bataja, la vole minare el forte sostegno popolare ke la gà.
la risposta del popolo irlandexe la xe masicia, grandioxa. Se trata dela pì granda manifestasión irlandexe mai fata prima. Ma sta granda asenblea de Derry la xe anca na festa. la festa dei poaréti, dei opresi, ke dal so numaro e dala so volontà de no rasegnarse ale leji dei "paróni", i se incoraja e i se carica de fiducia e de contentésa.

Ore 15.15
El corteo, on mucio longo, el scomisia a aviàrse. Ghe xe na atmosfera de serenità e de alegria. El selo el xe ciaro. Semo in tanti, semo invinsibili. Se tegnémo par man. Ridémo, cantémo.
Vegnémo xó dala colina par la strada prinsipale, infranxéndo, a ogni paso, la leje inposta dai inglexi.
Dale finestre, dale porte, el popolo oprèso, afamà, dixocupà e terorixà el se afàcia, el se entuxiasma, el ajita le man, el ride e el sbèca: forsa, corajo. Volemo rivare al sentro dela sità, dove ghe xe la rocaforte dei inglexi, dela rica borghexìa de Derry e dei poki pòri protestanti. Ma se le bariére dei inglexi le sarà insormontabili, fa' ninte.
Faremo el nostro comisio 'pena rento Derry liberà, in kel posto dove na scrita granda so na caxa, fata tre ani fa', la dixe: "STE' ENTRANDO IN TE LA DERRY lIBERA".

Ore 15.45
La marea de jente riva ai pié dela colina, l'eroico kuartiér de Bogside, tra i pì mixerabili, disperà del mondo, da tre ani sinbolo indistrutibile dela rivolusión. Semo in fondo a William Street, dove i "mersenari" i ga eleto na baricada co da drìo cari armà, idranti, mitra e mitraliatrisi: armi contro le man nude e i corpi inermi dela popolasión. Ala bariera, co filo spinà e cavali de frixia, scomisia le invetive e el lancio de sasi contro l'opresóre. Da da drìo i caroarmai scomisia subito na brutale represión: palotole de cauciù, gas CS, idranti co acua colorà, skifoxa, ke distruxe par senpre kei pori, unisi vestiti dei lavoradori e dei dixocupà.
Ma par la prima volta la jente la vol far festa e paxe. Pa on jorno. Xe mexi e ani ke, jorno dopo jorno, l'invaxore atàca, i ghe sara el so kuartiere e el deve pagare co morti e ferìi, e ghe xe senpre kel'infame de on gas ke inpregna, 'velenando tuto, rovinàndote la salute par senpre.

Ore 16.00
Kel sentenàro de persone ke xerà rivà ala bariera militare, sofegà dal gas, moio stónfo in tel fredo dai idranti, tanti ke i vomitava dala nauxea, el se ritira e el se agrega al groso del corteo ke ormai el xe rivà a destinasión. El palco el xe a 300 metri da William Street, dopo on piasale grando, pasà on grupo de casermoni alti 9 piani.

Ore 16.15
Da William Street ormai dexèrta i vién fora a na andatura pasésca, oviamente ciapando soto tuti kueli ke no i riese a farse da parte in prèsia - putèi e veci i xe stà copà cusì - i Saracens, grosi cari blinài co mitraliatrisi e pieni stavolta de paracadutisti inglexi. la jente no la vole altro gas. Stemo tuti male, i polmoni aroventà, i bronki streti dal tòsego. Scapémo verso Derry libera, ke la xe lì a do pasi. Ma no xe gas, stavolta, la xe la morte dirèta. Dai cari salta fora l'exercito, sparando in tute le diresión contro la jente ke la scapa sbecàndo. On comandante de ste iene sbèca: "30 el xe el limite". Trenta da colpire. I ghe la farà kuaxi perfetamente: 13 morti, 16 ferìi.
No ghe xe pì nisuni ke no gabia on saso, on bastón, na Molotov. Cosa se pol fare contro le boke da fogo a ripetisión de cani amatìi?
Ma l'eroismo dela jente de Derry el gà altri modi de manifestarse. I morti, i ferìi, ke i stà dapartuto (e gnanca on lamento te senti, se móre in silensio in Irlanda) i vién socorsi, soto la grandine dele palotole, da infermieri e socoritori, da on prete e da altri xovani. E i vién portai via. Ma tre i resta indrìo. I parà i li tira sù e li mete in te on blindà, come saki de patate. Altri i vién arestà e portà soi veicoli urtà coi calsi dei fuxili. Tre de sti ki i sarà dà dopo par morti.
la sparatoria la continua, la dura mèxa ora. E no la rivà pì solo ke dai parà rivài a William Street. Bogside el finise ai pié dela sitadèla de Derry, ke la gà mure alte. Deso se spara da lì, so la jente ke xe riusìa a rifujarse da drìo ai palasi de Ross Ville Flats. Ghin vién copài kuatro, ke i resta uno visìn a ke l'altro. Do i xera socoritori dei altri do.
On pare el traversa la strada co so fiolo. El tién le man in alto. I parà i mira e i lo colpìse a morte. On xovane el protèxe la so moroxa metendose davanti e skisandola contro on muro. On parà el ghe se avisìna, el ghe pianta la carabina in tel stomego, spara e cópa. On prete el serca de avisinare uno ke sta par tera. Xe na tenpesta de fogo; l'omo el se buta par tera e el riese a scanparla. Ma i socoritori i continua la so opera incredibile. Pì gh'in more, e pì gh'in riva. E dopo i primi diexe minuti de smarimento, eco ke torna la rabia, furibonda, ke la ciapa el posto del panico, dela disperasión. Pugni sarài ajità contri i mostri, invetive: "bastardi, 'sasìni, la pagarè". In mexo ala piasa, par morire almanco da omeni. Uno de kuei ke i sbèca el furore dei opresi ke mai el se plakerà, el casca colpìo al xenòcio: "sparè, sparè", el continua a sfidare i asasini.

Ore 17.00
Se spara a jornalisti, fotografi e a tuti kuei ke minacia de documentare el crimine. On tóxo soi 14 ani el pasa longo on muro co la pansa skuarcià. Ghe se 'visìna on soldà. El bòcia alsa na man par difèndarse in kualke modo. L'asasìn el spara da do metri.
L'IRA la se xera ritirà in tel sentro del kuartiér, par la marcia. Deso ke la riva, i 'sasìni i se ritira in te le so fortése de fèro e seménto. Ale 17.15 ghe xe el silensio. Solo, da kualke parte del Bogside, el pianto disperà, pién de urli de rabia, mai rasegnà, dele done. No li perdonaremo mai.
Vendicaremo tuti. In te la sede del'IRA se prepara i piani dela vendeta e la continuasión dela lota verso la vitoria. Xe pién de jente, xovani ke no i se gaveva mai visti e ke i riva a aruolarse in te la IRA, l'exercito republicàn de liberasión de l'Irlanda. Se organixa i contati co Dublino e i altri sentri. la raprexaja la sarà tremenda, come in te la tradisión del'IRA. E se deve catàre on sistema par far rivàre le informasión a Dublino, par far 'ndar fora la verità. I masacratori i stà fermando tuti kueli ke vién fora dal kuartiere e ki ke gà rulini o nastri magnetisi se li vede sekuestràre e bruxàre.
Partìmo a mexanote, par vie e sentieri de canpagna. El confìn co la republica el xe a sinkue kilometri. El materiale el xe salvo e el contarà al mondo de ke pasta ke xe fati i nemisi inglexi. A Dublino l'uficio del'IRA el xe asedià da xovani: studenti, dixocupà, operai. I vole armi, i vole lotàr, i vole la rivolusión. Dexine de miliaia de persone le se riversa in te le strade. No se xera mai visto na roba cusì. li organixa l'IRA. li porta davanti l'anbasàda britanica. Tri jorni e tri noti de asalti. Dopo el sinbolo del colonixatore el scomisia a bruxare. El governo, el primo ministro Lynch, i se scuxa co Londra. El popolo el vole la lota. L'Irlanda del Sud la xe tuta in te le piase. E tuta l'Irlanda del Nord la bruxa.
El masacro de Derry el gà radopià le file del'IRA. El ga sentuplicà la so forsa, morale e politica. I paróni no i inpara mai. la stupidità la xe parte de la so ferocia. Come ke dixeva on vecio a Derry fin ke'l toleva su' i resti de on martire: "Fra sento ani se parlerà de sto jorno come de l'inisio dela fine pai Inglexi".
El dì dopo a Derry el xera 'ncora on jorno de lota da drìo ale baricàde. Come senpre.
La lota la continua e Derry la xe libera.

Davide G.