STANPA

Me nona Ixeta la se ricorda 'ncora bèn quando ke magnare i gati xera considerà da tanti na roba "normale". Se parla dei ani intorno al 1940 sirca e, in te on paexéto del vixentìn, ghe xera quatro o sinque amisi ke i gaveva come pasión quela de magnare i gati. Gavì propio capìo ben!
I lo faxeva propio par pasión e parké i gati i ghe piaxeva: "Mejo dei conei!", i dixeva. E alora ogni ano, co rivava l'inverno, scomisiava la "cacia" ale pore bestie e, par dirla tuta, nesun gato el riusiva a salvarse. "Uno de sti amisi", ricorda me nona, "fora dal querto, dove ke vegneva fora i travi dela caxa, el gaveva fato tuto ciodi dove ke vegneva tacà su i gati, ke i se frolase". Xe durante el inverno ke se conpiva sta... tradisión: stiani no ghe xera difati frigoriferi e la jente, par tegnere la roba al fredo, la faxeva dele fose in te la neve e propio lì rento i meteva anca i pori gati, dopo averli ciapà. “Me ricordo, a propoxito de gati, ke me mama la gaveva on bel gato nero, groso, de 5 kili. On nostro cujìn, uno dei sinque ke ghe piaxeva magnare i gati, el ghe dixeva senpre a me mama: «Varda xia, na volta o l’altra kel gato lì el sparìse! Varda ke me lo magno!» E me mama: «Guai a ti se solo te me lo toki el gato, sèto, guai a ti!» E me cujìn: «Eh no xia, el xe masa belo e masa groso el to gato...». Insoma, fato stà ke na sera el gato no’l torna. E me mama: «Sta tento ke stavolta el me ga tolto el gato e el me lo ga portà via». Ke la sera me mama la ga trovà me cujìn e ghe ga dito: «Varda ke no lo go mia in caxa el gato stasera» e ke l’altro «Ma xia, come feto a dubitare de mi, no te lo go mia tolto mi el gato, ghe mancarìa altro!...» Ala fine i ga catà la pora bestia in tel sotoscala: el xera rento el saco; ‘pena ke i ga verto sto saco te ghe visto el gato scapare de corsa. Ke la volta la ghe xè ‘ndà propio ben.” Cusì finise el ricordo de me nona; magnare i gati par qualkedùn xera propio na roba normale: d’istà i xera magri, ma d’inverno i vegnéva bei grasi e xera alora ke “nesuni se salvava el gato!”.