STANPA

na straordinaria testimoniansa da na comunità veneta ke vive int’el Mesico

A Mèsico se oléa far na colonixasión "taliana" fa cuela del Braáil o la Argentina, ma é rivà sólke 2,600 taliani. La pi part veneti. I migradi i é rivadi inte 'n periodo de 2 ani. De le colonie fate, sólke kuéla de Chipilo (Cipìlo) la se à mancenést veneta de fatethe, léngoa e cultura. Inte kueleatre i taliani i se à misià suìto e i à pèrs le léngoe etnike.
In 1882 se à fat la colonia de Chipilo. La data de la fondathión al é al 7 otobre. É rivà skuaái 500 persone a sto pòsto kua, ma già ghe'n era 38 faméie gniste da nantra colonia (Barreto).
La Flavia Ursini, inte 'l libro Cent'anni di emigrazione (1983) la scrive ke a Chipilo é gnist an 84.3% de veneti e an 15.7% da nantre bande (Piemonte, Lonbardia). A Chipilo anca, come a Braáil, se à formà na koiné veneta sora kueleatre parlade.
I migradi no i à "catà la cucagna" no. Invénthe, i à catà tère arse (i indìgene no i le oléa gnanca). I li à ingrumadi tuti inte na costruthión vècia ke i migradi curioáamente i ghe ciaméa "Al Castèl".
Ghe à tocà farse le so caáe, oltar le tère. I à olést proar a semenar la vit, al formént e arlevar i cavaliér, ma de cuesto sólke al formént i à podést semenarlo. Kueiatri arte ghe à tocà desmentegarli e vardar de far atri mistièr. I primi ténp al laóro inte la colonia al é stat masa scars, elóra a i migradi ghe tokéa ndar a catar laóro da nantre bande. I conta ke toáàt e òmi i ndéa laorar luni e i tornéa indrio sabo. Tanti i é ndati via de la colonia: uni i à podést tornar indrio a i so paéáe, nantri i é ndati da nantre bande (Stati Uniti, o arte part del Mèsico).
Póc ténp dopo de èser rivadi, se à scuminthià dir ke al bastimént ke 'l li avéa menadi a Mèsico al se avéa sfondà dó a rivar inte 'l porto de Veracruz. Al pàr ke cuesto no 'l sie stat così, ma al importante al é ke i migradi i vedéa inte kuéla stòria là la imposibilità de tornar indrio a Italia. Par luri al à da èser stat come dir "Italia, par nuatri, la é infundida dó".
Inte i primi ténp, i migradi i morìa masa dóveni e in sèvito. Par luri mórer a i vintitrè o vintikuatro ani al era na desgrathia vista tante òlte. Màsima i òmi.
Da in printhipio i migradi i à vu rògne co i mesicani. Mèsico al é na nathión co véro poca dente bianca. Puebla -al stato onde ke ghe'n é Chipilo- al é un de kuéi onde ke ghe'n é de pi dente mora. Inte i ténp de la Rivoluthión mesicana (intórno 1910-1920) a i migradi ghe à tocà defenderse de i ataki de i mesicani ke i ndéa éntro par al paéáe parké i oléa robar e menarse le "güeras" (le biónde). Chipilo al é stat skuaái al ùnico pòsto ke 'l se à defendést pulito de i cativi forèsti.
A póc a la òlta la situathión la à scuminthià gnir pi mèio. Ma ghe'n era pi ke sia tre arte ke inte i cipilegni no i canbiéa mai: 1) I sevitéa maridarse intra de luri sól. 2) I sevitéa laorar inte le vake e 'l canp. 3) I sevitéa parlar la so léngoa minoritaria e etnica: al veneto.
Al fathismo al é rivà fin a Chipilo. I fathiste i à portà al "masso del Grappa" in 1924 e i lo à metést su inte la montagnéta ke ghe'n é a Chipilo; ghe'n é na tónba co 'l pitafio scrivést par italiàn, onde ke se parla del fascio e kualke faméia ancóra la à i documenti fathisti de i òmi metesti via. Dopo na s-cianta de "talianità" calda, Chipilo al à tornà a èser fa prima.
Al ùltimo cipilegno nasést a Italia al é mòrt in 1971, aromai 90 ani dopo de la fondathión del paéáe. Al se ciaméa Giacomo Berra Zancaner.
Ancó Chipilo al sèvita èser an pòsto onde ke se pól véder dente co le fatéthe venete, sevitón a sentir par le strade parole venete, sevitón a véder toáàt bióndi ke i goarna le vake, tóáe ke le nda tór al pan, thémene ke le leva su a le kuatro o thincue de la matina par scoar al so tòc de strada. Le bòce, al rigoléto, al bondì bond'an. Ma la dente la à scominthià misiarse masa tant co dente de nantra cultura; i é ògni òlta pi póki kuéi ke i ól sevitar a laorar fa "kuei de na òlta" e ghe'n é senpre de pi parole mesicane inte 'l nostro veneto,e de pi parole venete desmentegade. A Chipilo ancó ghe'n à da èser intórno 3,000 dente. Son masa póki par èser bóni de defénderse de i milióni de forèsti ke i ne ciapa sót.
La pi part de i cipilegni i vét co trankuilità kuél ke pasa: i é ògni òlta pi uáadi a véder ke gnén éntro dente ke la ól studiar al veneto ke se parla kua; i sa ke i taliani i gnén pi ke sia come turiste; i é uáadi ke i forèsti mesicani i ghe dighe "rathiste" (insianca ke i mesicani senpre i ne apie vist co òci de "ratha", come se i li avése ciamadi par ábiankedar kualkosa invénthe de par inpararghe le maniére de laorar).
Adès Chipilo al é là ke 'l scuminthia mórer. Kualkeduni i dis "no, al é là ke 'l cambia sól..." Ma, de tute sia le maniére, al Chipilo veneto, kuél ke 'l mancenéa i arte, kuél sì ke là ke 'l mór. Ghe'n é tanti ke i lo sa; ghe'n é nantri ke no i é nincòrti de gnént; ghe'n é de kuéi ke no ghe importa tant e ghe'n é dotrè ke i morirà insiéme de kuél Chipilo là.
Al pàr ke al destìn de Chipilo al sarà èser nasést veneto, vìver na vita cipilegna e aver na mòrt mesicana.

Eduardo Montagner