STANPA

Ghemo za visto come che spesso vien roversada la verità storica, parlando dela storia del Veneto da l'antichità fin a tuti i secoli dela Republica Serenissima.
Se però ciapemo el secolo che va dai ultimi del Settecento fin ala fine dell'Ottosento podemo ben dir che ghe xe un in grumo de busie da far inpression.
Basta infati vardar i comenti che continua a dir che la Repubblica Veneta iera inevitabile che la morisse, parchè ghe iera al governo solo che quatro patrissi incocaii e che ansi la maggior parte del popolo no vedea l'ora che rivasse Napoleone e i francesi, tanto che tuti sventolava le bandiere francesi e i tirava su l'albero dela libertà.
Ma se vardemo mejo le robe vedemo che in realtà ghe ze sta in quasi tuti i stati d'Italia in chei ani el fenomeno dele "INSORGENZE", solo che desso veramente studià a fondo, dopo dusento ani! Nel Veneto el xe sta bastansa difuso; nobili, preti, "cernide" (che sarìa sta le milizie contadine) ga ciapà le armi contro i francesi - L'episodio naturalmente pì famoso e clamoroso xe sta quelo de Verona, indove che se ga svilupà le "Pasque Veronesi" che ga in pressa parà via i Francesi (aprile 1797) .
Passando invesse al 1848 ghe sta in tuta Europa le rivolussion, tanto che ncora desso se dise "el ga fato un quarantaoto" par dir che uno ga fato straje. A Venessia xe sta mandà via i austriaci e xe sta ripristinada la Repubblica de San Marco, co a capo Daniele Manin. Ben, queo che de solito catemo scrito sui libri xe che i venessiani voleva subito fare l'unità d'Italia; in realtà ghe xe documenti che dimostra come che Manin volesse invesse na confederassion de stati indipendenti. E po' naltra testimaninsa dise che el popolo no se fidava par ninte dei Savoia, e i sperava che i ndasse via bonora. Val la pena de riportare da un manifesto del 1848: "Allora [il popolo si unì in ] grido generale: abbasso il Governo provvisorio di Carlo Alberto! abbasso i commissari governativi Sardi! Vogliamo Manin! vogliamo la Repubblica! Viva San Marco! (…) Le truppe sarde e napoletane furono per così dire scacciate da Venezia giacchè dopo infinite improprie scagliate con tro le medesime dal popolo, vennero imbarcate sopra navigli mercantili, e spedite in patria per la via di Ancona". Cossa podemo dir de 'sto brano? Ninte, el se comenta da solo e el ne testimonia 'na volta de pì che la storia la scrive quei che vinse.
Co' rivemo po' a l'unità d'Italia, la xe el calieron dele tute le robe roversae. Volemo precisar subito che qua no se trata de darghe razon a qualche parte politica che magari la ga su co el governo italian ma che 'ste robe xe stae vermente cussì e noaltri no podemo farghe ninte, ansi podemo solo che far de tuto par renderle ciare a tuti. Tanto par essere s-ceti e dire che no lo gavemo su co i meridionali, mi penso che i dani pì grossi da l'Unità d'Italia li gabia vui quei del Sud che i se ga trovà sfrutai e sora de tuto i ga visto massacrai un mucio de omeni, done e tosati co la scusa del "Brigantaggio". 1
Ben, tuti sa che el Veneto xe stà "liberà" dai Italiani nel 1866. L'Italia, se ricorda so i libri de storia, a gavea perso la batalia de Lissa, indove che, xe giusto ricordarse, i veneti ga combatuo e vinto contro i italiani dentro la Marina austriaca, sigando "Viva San Marco". A sto punto se ricorda i risultati del famoso Plebiscito, che sarìa la prova de come che i veneti i iera promosi de aderire al'Italia. Podemo cussì vedare che gnanca i numeri no i xe concordi, parchè da na parte xe scrito che i sì iera un numero, da naltra ghe xe na cifra diversa, anca co miliaia de diferenza. Ma soratuto ricordemose che ga votà solo el 26% de tuti i Veneti, indove che paraltro el voto no iera par ninte segreto, dato che le urne pal sì e pal no iera separae cussi se vedea subito cossa che uno votava! 2
So chei ani là a ghe iera pì de qualchedun che no iera a favor de l'anession a l'Italia se girava 'na canson come " Co le teste dei Taliani zogaremo le borèle [le boccie] e Vitorio Manuele metaremo par balìn". Concludemo a parte de l'Ottosento solo che ricordando che le Veneto xe 'nda dopo l'Unità de mal in pezo, cussì che milioni de Veneti ghe ga tocà partir emigranti in America.
Le do guere mondiali xe stae vissue come on drama dala popolassion veneta; distrussion ritegnue ingiuste, drami come quelo de paesi intieri trasportai via col treno dal fronte: pensemo ai paesi drio al fronte del Piave come Cavaso, Onigo che i xe stai deportai in Sicilia, a pì de mile chilometri da casa. 3 Ghe xe po' on aspeto inportante dela popolassion contadina veneta che xe nel 1919-1920 le Leghe Bianche, movimento de protesta par la riforma agraria che gà portà anca fati violenti : i gà sachegià e brusà varie ville de nobili e siori de alora.
Pensemo solo che 'na s-cianta ale distrussion dela guera civile, parchè de questo se trata, conbatua tra 1943-1945, fin che i aerei dei anglo-americani distrugea paesi e cità intiere come Treviso. Xe ciaro comunque che nel Veneto come ne le resto del nord Italia i omeni iera spacai in do parti: on pochi combatea co la Repubblica de Salò, co Mussolini, altri combatea coi Partigiani, apogiai dai Alleati. Tute do le parti alora credèa de essere so el giusto e de conbatere pa la libertà.
I fati pì recenti forse i xe massa freschi par essare comentaì so i libri de storia; de certo podemo concludere che xe 'ncora tante le busìe o i fati sconti de la nostra storia, xe evidente che forse fa comodo tegnerne ingnoranti, fa manco fastidi la zente che varda par television el "Grande Fratello " che chi che se interessa de vardare la magnarie che el governo ghe ga fato sora la testa, o no ?
(continua)

Daniele Marcuglia
Presidente Asociasión Cultura£e
E NOSTRE RAIXE
www.culturaveneta.org/ENostreRaise

1 Vedi L. DEL BOCA, Maledetti Savoia, 1998
2 E. BEGGIATO, 1866: la grande truffa. Il plebiscito di annessione del Veneto all'Italia.
3 C. PAVAN, La Grande Guerra, 1997