STANPA

In Veneto da ani ormai se discute sora la sanità e su come poder far fronte a sto problema ke ga creà, pian pian, na vera e propia vorajine.
“I me ga cresù ‘ncora le medisine, ma te par justo?” dixe i nostri veci, “come podemo fare co la nostra pensión se i continua a crésarne le pastilie e le ricéte?”. Ste ki le xe le preocupasión reali de ki ke ghe toca subire i rincari sensa fine ke continua a rivare.
Xe on dato de fato ormai ke ticket i sia senpre pì cari, par no parlar de la politica de tajare i posti leto (e, quindi, i ospedali veneti). Da spetatori esterni ne vién da domandarse alora: ma xe sta ki la strada pì justa?
Faxendo on paso indrìo, vardando i dati sora la penixola tajana la spexa par la sanità la inside pal 5,9% (ano 2000) del P.I.L., soto i valori de st’altri stati europei e non:
Jermania (8%)
Francia (7,2%)
Danimarca (6,8%)
Norveja (6,7%)
Svesia (6,6%)
Canada (6,5%)
Beljo (6,2%)
Svisera (6%)
Japón (5,9%)
Sta de fato però ke la vorajine de la spexa sanitaria la continua isteso a slargarse, sensa fine. Cosa fare alora a sto punto, se se domanda. Come córare ai ripari?
Pare propio ke la unica sielta da poder fare la sia sta quela de tajare in tuti i modi le spexe, conprexi ospedali e posti leto e de riscomisiare a parlare de ticket: dal 1° de Aprile el costo dei farmasi el se xe sbasà, par adeguarlo al valore medio de la Europa, ma se ga introdoto de novo i ticket soi farmasi de fasia A, quei considerai “salvavita”.
Davanti a sto problema dela sanità la Rejon del Veneto la ga aprovà de resenete na delibera de riorganixasión de la rete ospedaliera rejonale, co la nasita de nove polemike e proteste da parte de sitadini e de sindasi veneti. Uno dei caxi ke ga fato pì parlare e ke ga indignà de pì xe sta la kiuxura de l’ospedale de Auronzo, uno dei sentri sanitari pì inportanti de ke la xona. El sindaco del paexe, Walter Antoniol, fin da subito el se ga batù contro sta decixion inposta da l’alto, invitando tuti i altri sindasi del conprensorio a unirse insieme e fare ricorso contro sta diretiva. Par no parlare dele miliaia e miliaia de firme ke, ala fine de l’ano pasà, xe sta catà su in tel Baso Visentìn dopo ke la Rejon gaveva dà tute le diretive sora el futuro dela sanità in Veneto e dele proteste e dei cortei in piasa ke xe sta organixà in tei ultimi tenpi.

SPEXA STATALE
ANNO 2000
par abitante al neto dei interesi (in euro)
Vale d'Aosta 6.929
Bolxàn 6.505
Trento 6.138
Sardegna 3.850
lazio 3.776
Sicilia 3.537
Friuli V. J. 3.408
Basilicada 3.240
Calabria 3.184
Molixe 3.098
Canpania 3.034
liguria 3.012
Unbria 2.808
Abruso 2.718
Pulia 2.708
Toscana 2.399
Marke 2.158
Emilia R. 2.038
Piemonte 2.002
Veneto 1.859
lonbardia 1.818