STANPA

Ogni ano in te le piase de borghi antighi, in casteli medievali o intorno a cexe o monasteri, rivive eventi memorabili e ricorense popolari del Veneto grasie ale rievocasión storeghe. Co ste manifestasión, ogni volta se rivive serimonie e eventi ke i se perde in tel tenpo, quaxi lejendari; altre volte invese le rievocasión le fa rivivare momenti de storia reale, riportando ala memoria antiki personaji e storie particolari, co costumi e anbientasión ke le te porta indrìo a kei tenpi distanti e mitisi. Ste rievocasión le deventa cusì na testimoniansa dela memoria dele comunità on mucio inportante e le pole jutare a catare e far rivivare la identità e la orijine del nostro Popolo Veneto. Se torna cusì indrìo, a on pasato lontàn ma 'ncora vivo e ke te incurioxise e te conquista ‘ncora al dì de uncuó. le tradisión storeghe le torna a esare realtà, na realtà ke xe rento de nialtri, patrimonio culturale de tuti i veneti. A tuto sto inportante mondo ke se riscoverxe ogni ano co le rievocasión, la rivista "Le Tre Venezie" la ga dedicà on numaro speciale: co sta bela publicasión se pol capire la inportansa e la belesa dei eventi storeghi ke rivive in Veneto grasie, par exenpio, al Palio de Noale, ala famoxa Partìa dei Scaki de Marostega, dala "Marciliana" de Cioxa ala rievocasión de Este e la Regata Storega de Venesia. On libro unico e spetacolare, pién de belisime foto e de nostisie e raconti sora na storia visuda dale varie comunità del Veneto ke torna ogni ano a rivivare in mexo ala jente.

info su: www.letrevenezie.com