STANPA

Sto libro no el se propone come on disionario o na gramadega conpleta de la lengoa Veneta.
El xe sta pensà da l'autore, col sostegno de l'Asociasión culturale "E Nostre Raise", come on strumento divertente e utile pai putei ma anca par i grandi par scoversare o riscoversare la nostra lengoa mare, da masa tenpo dispresada da ki ke no la ritién degna de esare parlada e studiada.
Sta inisativa la ga ciapà spunto da na edisión del steso tipo fata da poco in Provensa, "Mon premier dictionnaire francais-provencal èn images", edisión Gisserot 1999, xa difuxo in te le scole dove ke vien studià el provensale.
El libro el se conpone de on abesedario co vari exenpi par ogni letara de l'alfabeto, de varie skede a tema (i numari, le parti del corpo, le bestie, i dì de la setimana, ecc.), de na parte indove vien da’ on asajo de la storia de la lengoa e de la cultura veneta, de na prexentasión dei esari fantastici de la tradisión veneta (le strighe, le anguane, el Baxilìsco, ecc.), de on calendario de le feste venete e de na prexentasión dei mestieri de la tradisión artijana.
Na parte xe dedicada anca ai exercisi, par metare ala prova le conosense dei putei.
On libro, insoma, ke no pole mancare in ogni caxa veneta, da regalare ai nostri putei e ai putei dei nostri amighi, par far sì ke la cultura veneta la rivi anca ale nove jenerasión.
El libro, ilustrà a colori, el vién a costare solo ke 12 euri; par averlo se pole domandarlo ala caxa editrise Scantabauchi, vicolo Parentino 25 , 35132 Padova (tel. 049/86.47756) o diretamente a noantri de Raixe Venete.