STANPA

articolo publicà sol nùmaro 12 de Raixe Venete

On poeta del'oriente scrivea inte on so poema ke "el laoro xe el sogno dela tera ke se realixa". Par nialtri Veneti el laoro xe a stesa roba, semo cofà la tera, semo la tera stesa anemà dal fià de Dio, ke’l xe on gran laoratore, el pì grande de tuti, el sèita a laorare, jorno e note, anca la domenega, al contrario de tanti preti e de tanta xente ke se dixe parente nostra.
Niantri Veneti no apertenemo ale spece omane parasitarie o canibae, no xe da niantri robare, rapinare, sequestrare, estorxere, domandar elemoxena-asistensa-carità-grasia divina-miracoli-vinsite al loto o al toto- pretendar de vivar sue spale dei altri par un dirito ke no xe dirito ma calcosa d'altro de ben più mixaro. Niantri non semo furbi…fa sta jente!
Inte la nostra storia milenaria no ghemo mai sviupà seti de nobii ke no laora parkè nobii, infati i Veneti ga prodoto solo republica, mai né monarkie né inperi. Nea glorioxa Republica Veneta ghe jera sì i aristocratisi ma i laorava anca lori; antri popoli invese i ga sviupà la monarkia ke no xe antro ke na comunità doe alcuni vive sue spale de altri sensa far gnente col'uxo dea violensa. Niantri i valori dea uguajansa, dea libartà, dea dignità, dea democrasia, dea republica ove ogni omo-sitadìn xe paron e sovran i gavemo inte’l sangue, nel dna storico e culturale, ognun ga da vivar col sudor dea fronte cofà i primi do omeni ke xe sta parà fora dal paradixo. Par niantri el laoro no xe na condana, cofà pai do ke xe sta parà fora dal jardin (ke forse i jera prinsipi); par niantri el laoro xe na condana solo se doemo laorar da servi maltratà o da s-ciavi, xe na condana se doemo sudar par xente ke prefarise contenplar el laoro de Dio e de cuei ke se sente fà lù.
El Dio dei veneti xe on Dio ke laora, non xe on Dio ke fa laorar co la frusta, (me sa ke i soiti furbi i gabia canbià anca e sacre scriture).
Niantri no podemo gnanca imajnarse on paradixo doe ke no ghe sia el laoro, on jardin doe se staga coe man in man a no far gnente o solo a cantar, poetar come i furbi de xò, o solo cucar cofà kealtri del medio oriente. Basta vardar come i xe conbinà, kì, inte la tera, oncó! La voja de far, de laorar la xe na grasia no na disgrasia, la xe na fortuna no na condana. Eco el capanón! Questo xe el senso del capanón, on toco de tera da far frutar col suor, doe i nostri sogni fà semi se pianta inte la tera e i crese col consime dea nostra fadiga e l'acua del nostro suor.
Sicome no se poe aver tuti on toco de tera, parké la tera xe cuea ke la xè, el capanón ga ciapà el so posto, el xe on spasio de libartà doe se poe, cofà Dio, inpastar e plasmar el fango e i nostri sogni coi strumenti dea fadiga, del sudor, del'inteijensa, dea tenica, dea siensa (ke xe tuto laoro del'omo de imitasión del laoro de Dio ma man ke lo scopre vardando a so creasión). Niantri Veneti no ghemo mai visudo col laoro dei altri, dei s-ciavi, coe rapine, come ga fato tanti antri, ke ne ga fato concorensa sleal in tel mercà del mondo pal pasà e ne gà inpedìo de riprendarse invadendone e paralixandone prima coa scuxa de portarne i valori dea republica ke niantri gaveimo xà e dopo i valori taliani ke 'ncora deso no savemo cuali ke i sipia, parkè no li gavemo gnancora mai visti. I gheto visti ti? Semo senpre 'ndà in jro pal mondo co la rikesa dea nostra voja de laorar e gavemo senpre trasformà el fango doe semo rivà inte on bel jardin e tuti xe senpre restà incantà e ne gà copià.
Atraverso el laoro niantri Veneti riscatemo la nostra libartà, a nostra dignità, e nostre mixerie omane fa na disiplina asetica, fa na preghiera de fati pì che de ciacole. Par cuelo el capanón xe inportante, parkè el xe on arnexe de libartà, de dignità, de democrasia, de republica, de nobiltà vera, ogni veneto ke laora par conto suo el sente fà on prinsipe on re, paron de se steso ke xe el fondamento de ogni vera democrasia e de ogni vera republica doe tuti i omeni xe conpagni e sovrani. Drento el capanón ghe xe spasio anca par pi picoi capanóni de libartà e de dignità, pa i colaboratori ke non pol o no vol on capanón pi grande e ke i podaria star mejo se no ghe fuse i veneti furbi e i canibai tajani. Anca i capanuni podarìa esar manco se podesimo laorar da omeni libari e non da s-sciavi de fradei ke no xe fradei e de na republica ke no xe republica e ke ne spoja de gran parte del fruto dea nostra fadiga. Podarisimo star mejo e come ke gavemo senpre fato podarisimo 'ndar pal mar del mondo co le navi de tera ke xe i capanóni, a portar laoro e sana rikesa in jiro e col laoro i valori dea libertà e dea vera democrasia, contribuendo cusì a realixar el sogno dea tera e l'opara de Dio, trasformando ogni tera nea nostra tera, nel nostro Veneto ke altro non vol dir ke tera de libartà, de rispeto, de amor, nea consapevoesa kel dirito xe calcosa ke se conquista solo co la fadiga dea responsabilità e del propio laoro. E finiso dixendo ke i Veneti i ama tanto i skei parkè i skei veri e boni no xe altro ke laoro, laoro e fadiga, laoro condensà ke merita rispeto el masimo del rispeto.
Kuei ke no laora e ke vive dea fadiga dei altri, dispresa i skei e i dispresa ki ke laora fà s-ciavi.
Alberto Pento