STANPA

articolo publicà sol nùmaro 12 de Raixe Venete

Continuemo el nostro viajo a la scoverta de i Veneti in Bretagna, sercando de analixare inte sta seconda e ultima parte cosa che ga lasà sto popolo a la cultura de i Bretoni de uncuó

Ansi tuto, savemo che ea capitale de i Veneti se ciamava Gwenned, sità che vien ricordà anca inte na famoxa filastroca bretone del 19 secolo, ciamà Barzaz Breiz:
Dek lestr tud gin a welet
O tonet euz a Naoned:
Goa!c'hui;goa! tud Gwnned!
"Diexe batei che vegneva da Nantes: maledeti vialtri! Maledeti vialtri! Omani de Vannes!"
Quaxi de sicuro el poeta, co el parlava de sti diexe batei che i vegneva da Nantes, el fa riferimento a le navi de Cesare, in quanto savemo par serto che eo el vegneva da la Loira in diresion de Gwenned, uncuó ciamà Vannes. Insoma, ea storica capitale de i Veneti ea xe ricordà parfin inte la pì celebre de i ritorneli bretoni. Na filastroca, peraltro, che ea vegnarà tradota inte on mucio de lengue e so le note de ea quale se formarà anca na cantilena de i emigranti Veneti inte l'agro Pontino, ciamà I Santi Tre Re Magi.
Ma i "resti" de la cultura del popolo veneto no se ferma qua; naltro interesante aspeto da notare xe che ea parola Gwenned se cata, quasi identica, inte 'l nome de la bandiera nasionale bretone, ciamà “Gwenn ha du”. Senplice caxo de analojìa? El sospeto, quindi, se cusida se poe ciamarlo, xe che sto popolo gabia condisionà e segnà, in parte, ea storia de ea Bretagna.' Ncora deso, par verità, ea economia bretone se fonda on mucio so la pesca, storica risorsa de sta xona e abilità forse eredità anca da i Veneti del posto, e 'ncora deso ea xente locale xe fortemente tacà a la so tera e le so belisime tradisión. On patrimonio questo culturale, da difendare e da valorixare, tanto che ea lengua e ea storia bretone, Veneti conprexi, vien insegnà inte le scuole del posto parchè tuti sapia cosa che jera Gwenned.
Proprio par questo vien rabia vedendo, invese, come da le nostre bande, ea cultura de i nostri antenati Veneti (testi de lengua, canson, anedoti, citasion, personagi o fati storici) che tanto ga dà a la cultura 'tajana vegna tante, masa, volte desmentegà inte i libri de i nostri putei che và scuola.
Ritegno, infati, che xe on dovere che i nostri toxeti savere come che se ciamava i sete coli de Roma, i sò re o chi che jera Romolo e Remo. Ma credo anca che xe nostro inegabile dirito insegnare a i nostri fioi ea storia de chi che ga fato granda stà nostra belisima tera.
A. R.