STANPA

articolo publicà sol nùmaro 12 de Raixe Venete

La Basilica de San Marco la xe vixitabile anca via Internet, ‘traverso on sito pién de informasión sora la storia e le richése del logo de culto pì inportante de Venesia

Internet e la tecnolojìa, al dì de uncuó, i ga fato pasi in vanti on mucio grandi. Colegandose co on conputer a internet se pol avere on archivio de dati a dispoxisió sterminà: testi, imajini, video, animasión e tanto altro 'ncora.
On bon exenpio ne riva dal sito dedicà ala Baxilica de San Marco. Sto portale el xe dinamico e interativo e, co dele interesanti animasión, el te porta a scoversare tuti i segreti e le belese dela nostra Baxilica.
Xa da l'introdusión del sito ne vién spiegà che "La Basilica de San Marco la xe on monumento unico par la richésa de la so storia, la maestoxità de la so faciada e del so interno, laboratorio on mucio belo dove che ghe ga operà par dei secoli grandi artisti nostrani e europei. La grandésa de Venesia se la se ga senpre specià inte l'arichimento de la Basilica: i venesiani i la ga abelìa inte i secoli portando dai posti pì distanti manufati presioxi e opare d'arte. Uncó, purtropo, sicome el numaro dei vixitadori el xe enorme, se pol vixitare sto joielo universale solo che in parte: sto sito ne dà na conosènsa completa e el svela i significati relijoxi che no i xe percepibili fin da subito da chi che viéna vixitarla".
Ve segnalemo in particolare la posibilità de vedare sol schermo la Baxilica in 3 dimensión, le panoramiche, la cripta e el batistero, co la posibilità de jirare le imajini a 360°. L'efeto el xe sensaltro realistico.
Interesanti le xe dopo le informasión sora la so storia, la vita de San Marco e la cronolojìa dei pì inportanti fàti che riguarda i Doxi de Venesia e la Baxilica. Lo savevi par exenpio che la prima céxa de San Marco la xe sta fata costruire dal doxe Giovanni Partecipazio (o Particiaco - 829-836)?
La Baxilica de San Marco segno indelebile e ncora maestoxo dela Serenisima ne speta, par dirne ncora on mucio sora la nostra glorioxa storia.

D. Guiotto
info@raixevenete.net