STANPA

articolo publicà sol nùmaro 12 de Raixe Venete

In prinsipio Dio crea el musso e 'l ghe dixe: "Te sarè musso. Te lavorarè sensa mai lamentarte, da l'alba al tramonto, portando pesi soa schena; te magnarè erba, no te gavarè intelijensa e te vivarè fin a 50 ani. Te sarè on musso".
El musso el ghe risponde: "Sì, sarò on musso però vivar fin a 50 ani xe massa; damene 20".
El Signor alore el ghe dise: "Va ben".
E dopo Dio el crea el can e 'l ghe dise: "Te sarè can. Te difenderè la casa de l'omo e te sarè el so mejor amigo; te magnarè quel che i te darà e te vivarè 25 ani. Te sarè on can".
El can ghe risponde: "Signor, vivar 25 ani xe massa par mi, dame 10 ani che me basta par mi" e el Signor lo ‘contenta.
Dopo Dio el crea la simia e el ghe dise: "Te sarè simia. Te saltarè de rama in rama fasendo la paiassa, te divertirè tuti e te vivarè 20 ani. Te sarè na simia". Signor, vivar 20 ani la xe dura! Damene solo 10 de ani" "Va beh, concèso" el ghe dise el Signor.
Finalmente Dio el crea I'omo e 'l ghe dise: "Te sarè omo. L'unico essere bon de rajonar so la facia de la tera; te doprarè la intelijensa par comandarghe ale bestie; te dominarè el mondo intiero e te vivarè 20 ani. Te sarè on omo".
El ghe risponde I'omo: "Signor, sarò omo ma vivar 20 ani me par pochéto; dame i 30 ani che el muso el gà rifiutà, i 15 che 'l can no ga vossuo e i 10 che la simia no gà acetà". E cusì el Signor el ga fato.
Da alora l'omo el vive 20 ani da omo, el se sposa e el passa 30 da musso lavorando e portando tuto el peso dela fameja so le spale. Dopo quando i fioi i va par conto suo el vive 15 ani da can, tendendoghe ala casa e magnando quel che ghe vien da', par dopo rivar a essar vecio, 'ndar in pensión e vivar par altri 10 ani da simia, saltando de casa in casa, da fiol in fiol e fasendo el paiasso par far divertir i nevodi.