 STANPA
trate da:
Marisa Milani, Streghe, morti ed esseri fantastici del Veneto, Padova, Esedra ed., 1994
La Piatha del Diaol
I dis che l'è opera del Diaol, che l'è la so piazza e che l'è geloso che 'l sie. Parché non passe nessun par de là, 'l ha fat rodolar na montagna creando an labirinto par chi vol passar via. I dis che tanti se ha pers e non i é pi tornadi a casa, e alora i sentia rider e sghignazzar. I dis che lassù 'l è el ritrovo delle strighe, che le ariva da tute le parti par far na gran festa, montade su scoe e can e altre bestie. Le bala, le ride, le canta par tuta la not. Le fa consilio e gran orge. I ha vist foghi e fiame e sentì urli e gran bacan. A la matina bonora le se dilegua par la so strada.
La Peca del mazzarol
'L era an omet picenin, vestì de rosso, che lassea le peche dove el passea. Quando la dent metea el piè su ste peche, non l'era pi bona de vegner fora e i girea intorno perdendose. Na olta an om el se avea venturà su le boe de Scarnia e 'l avea mess an piè su la peca del mazzarol, e non 'l era pi bon de vegner a casa. Anche la sorela de me nono l'era andata sui borai de Scarnia e non l'era pi bona vegner fora, e l'ha scominzià a osar: "Vegné a torme! Son su le boe de Scarnia !" E 'l era vero che la se avea persa. Non se sa el perché. Se pensa l'avess mess la scarpa su la peca del mazzarol.
La catha selvarega
Me nono me contea che 'l era un branco de can selvareghi rabiosi, che girea de not par i nostri paesi magnando carne de tute le sort: i sbranea un po' de tut. Le fameie che avanzea un po' de carne, i la atachea su la porta e i zighea: "Caza selvarega, vien a torte la to carne !", parché i avea paura che sto branco de can rabiosi i ghe magnesse le bestie e anca lori. Ghe n'era an on che 'l vivea su la montagna e non 'l avea paura de sta cazza selvarega. Na not però sti can randagi i è arivadi da le so parti sgrafandoghe la porta, e lu serandosse dentro el se ha salvà. El dì dopo el se ha fat insegnar dai veci, par sconderse dai can, de far an bus in mezo al fien. La not i can i fa ritorno e non i trova nient da magnar. La matina el vien fora dal fien tut content e el verde la porta de casa. E cossa védelo ? Con gran oror el cata an cadavere picà sula porta !
La catha selvarega (2)
Ne le malghe, su qua nel Margni, su là par andar a Cros d'Aune, i era su co le bestie, a far fen, e cossì, ah, de note, quando ormai le era nel pien del sono, alora le sentia dele... I ghe ciamea la catha selarega. L'era na muta de cani che no se sa de dove veniva, e i baiava, i fea tuto strepito. E i ha apena fat in tempo a serar la porta prima che la entra nel fienile. Co sti raconti, co ste cose, i giovani no i avea pi coraggio de moverse de casa.
L'orchessa
Qua a Umin i nostri veci i raconta che un nostro paesan se alzava bonora per andar a racoliere sboasse, perché el sofria d'insonia. Na matina alzando i oci el vede una dona grandissima, che la tegnea un piè su Col Mol e l'altro sul'altra parte de la val, sui Valegat, e la ghe ha dit: "Dove vatu ? De note se dorme e de giorno se lavora !". Alora el nostro paesan 'l é tornà indrio e da alora non 'l è pi andat de note a sboasse. Ancora ancò se nota, su l Col Mol e sui Valegat, le peche del'orchessa.
El bagalis (badaliss, basilisco)
El bagalis i disea che 'l era na bissa, grossa, co la testa come un gal, con la cresta, e quando che la passea brusea l'erba. L'avea come fogo in boca, e tuti i avea paura. La se metea su i muret, onde che ghe n'era an bus. Andea là a nascondesse e, quando che passea qualcuni, la sofiea. La fea prendere paura. Mi no l'ho mai vist, no so se el è mai esistì.
|
RAIXE VENETE - el jorna