STANPA

Par fasilitare i letori ke par la prima volta se avisina ala lengua veneta scrita elenkemo le regole prinsipali ke ghemo seguìo sol nostro jornale e so sto sito, salvo el fato ke lasemo libertà de scrivare secondo anca staltre regole riconosude dal “Manuale Grafia Veneta Unitaria” edito da la caxa editrice 'La Galiverna de Batalia Terme' comisionà dala Rejon del Veneto sol 1995.

La lengua veneta no ga dopie.

Consonante sorda S: come baston (bastone), salgaro(salice), sòto (zoppo);

Consonante sonora X: se dòpara la X so quatro caxi:
1 soa tersa persona del’indicativo prexente del verbo èsare: xe (è,sono);
2 tra vocali: piaxe (piace), doxe (doge), luxe (luce), roxa (rosa), dixe (dice);
3 quando ke la segue na consonante: pianxe (piange), vèrxe (apre e verze);
4 al’inisio de na parola: xonta (giunta), xèro (zero), xio (giglio);

Consonante esploxiva sorda K: al posto dela CH es. Karega (sedia), toko (pezzo).

Semiconsonante L: xe ciamada “elle evanescente” e no ga on equivalente in taliàn. Se dopara in do caxi:
1 al’inisio de parola seguia da vocale non palatale (A,O,U): late (latte), longo (lungo), luna (luna);
2 tra vocali non palatali: gola (gola), gondola (gondola), parola (parola);

La naxale NP NB al posto de MP e MB taliane: inbuto (imbuto), inposibile (impossibile).

Consonante sorda alveolare+consonante sorda palatale S-C: la lineeta ne dixe ke le do consonanti le ga da pronunciarse distinte: mas-cio (maschio), s-cenxa (scheggia), s-ciantixo (lampo).

Semiconsonate anteriore J, la sostituise la I solo in do poxisiòn:
- al’inisio de parola: jeri (ieri), judisio (giudizio), jutare (aiutare);
- in poxisiòn intervocalica tra do vocali silabike: mejo (meglio), mujere (moglie).

Naturalmente semo verti a tuti i tipi de scritura basta ke i sipia adeguai ala Grafia Veneta Unitaria.
Ricordemo anca ke la scritura xe solo na convensiòn par riprodure dei suoni; l’inportante xe capirse.